Finalmente in Cina

Arrivemo a Shang-hai. Un porto immenso – Longo e longo: ma no gh’è maraveja, parché Shang-hai l’è messa a parte del fiume immenso che se ciama «Whangpoo-Kiang» e basta continuar, e el porto el vien longo finché volì. La città l’è bella e gh’è più commercio che non a Peking e a Hong-Kong. Gh’è le so brave concessioni straniere – queste zè serti posti in, Città riservadi ai stranieri – ghè el posto dei taliani, dei franresi, dei americani, degli inglesi, ecc. e anca le strade le porta el nome secondo la nazionalità dela gente che gh’è dentro. Noaltri tiremo un respiro – parché finalmente semo in Cina, tanto desiderada – ringraziemo el Bon Dio che el n’a dato bon viajo, en complesso, e con calma pensemo cosa gavemo da far.

Prima de tuto, gavì da saver che da Hong-Kong, noaltri gavemo mandà un telegramma al Console, del nostro arrivo, e tutto par via de quei 18 cassoni che gavevimo e che volevimo i passasse senza farne diventar mati. Erimo quindi quasi sicuri de trovar qualcheduno del Consolato italian in porto. Guarda che te guarda; se metemo in ciaro parché i ne veda pulito – ma che? no gh’è un can. Intanto vedemo che quei che smonta i ga i so bauli rimessiadi su – anca i ga avudo el loro compagno ministro protestante de Shang-hai che el li ga aiutai – e noialtri, no vedemo nessuni; ma gnente paura. Cossa volìo che el gabia paura quel che per tanti anni la savù arrangiar tante cose e tante case? Lù che l’à tratà con persone grande – con ministri e generai, con medisi e avocati – con ingegneri e con ministri e artisti – con secolari, con preti – lù che l’ha tratà ancora con Vescovi e parfin col Papa – che nol ga paura, no delle mosche, ma gnanca dei mussolini – lù che el gabia paura? Ah! no no. El ne lassa lì – el ciapa un auto e via dal Console. Pensè che tutti i parla cinese, e lù nol ghe ne sa una parola. Corri che te corri, el chefeur el lo mena en te un Convento de Moneghe – apena drento el cata na monega che la se ghe buta ai piè e la ghe domanda la santa benedizion. Eh! se non la vol altro? Lu el la benedisse, e po el se fa insegnar el console – ma quela là non lo sa, e la ghe insegna una casa de Gesuiti francesi. – El va dopo dal Console ma nol ghè – l’è andà a caccia, parché l’è el primo dell’anno. Alora el torna sul Kashima e el me dise che el Console nol gh’è e che bisogna che se rangemo. El torna fora in Città e el va ala Procura dei Padri Lazzaristi che i ghe gera stai insegnadi dai Gesuiti. L’arriva e el trova el Procuratore Generale che gentilissimamente el lo fa entrar – el ghe conta e spiega – el lo consiglia meio de quanto l’avaria fatto un so fradelo e po el ghe manda drio un fradel laico che el dosèa desbrojar fora tuto. Caro fradei Giuseppe! te sì francese, ma te vali un Perù! L’arriva al Kashima, e in te na mezz’ora, lu che el parla così ben el cinese, el ne despegna tuto – el ghe dise non so cossa a quel musetto da pan fresco che ghe gera ala Dogana, e la conclusion l’è che senza gnanco verzar le casse, le portemo via e felice sera. Brao, fradel Giuseppe! – te ghè nome Joly, ma te se proprio belo e brao. Arrivemo alla Procura dei Lazzansti, e el Superior el ne dise: Quà gavì casa, e da dormir e da mangiar – fin che riceverete ordini dal Delegato di Pekino, state qui con me, e poi farete quel che il Signore disporrà.

Podevelo parlar meio? Ela miga sta una providenza per noaltri? Mi, me lo imaginava – parché lavorando pel Signor, tutto va drito. No la n’è tocada così anca in Brazil quando semo andadi la prima volta? Basta metarse nele mani del Signor. Semo vegnudi in Cina a far palanche? cari voaltri! proprio quà l’è el posto dele palanche! se vedessi che miseria! che povertà, che strazzi che se vede per strada e dapertutto! Donca per far presto, semo restadi in casa dei Lazzaristi 5 giorni, tratadi come mai lo semo sta da nessuno; e quando gavemo volù pagar quasi i se rabbiava; e quando semo partidi, lori stessi i s’è incomodadi a telegrafar ai loro Padri de Tientsin, parché i ne vegnesse incontro e i ne ajutasse, ecc. L’è, che mi non so quando vedarò el Suparior nostro; ma se ghe fosse vissin, ghe dirìa proprio de mandarghe anca lu una letara a quei boni Padri e ringraziarli, anca lu, per noaltri. No gavemo mai visto carità più bela e maniera più gentile. Che Dio li benedissa e ajuti sempre. Intanto in quei giorni gavemo avù la comodità de andar a Zi ka Wei che l’è un posto vissin a la cità e dove che sta i Gesuiti, parché in Shang-hai e dintorni comanda i Gesuiti. Lori i gà tre case – una a sto Zi ka Wei  dove la se ciama anca Catedral dove fu tenuto il Concilio plenario cinese 2 anni fa da Monsignor Costantini – e là gavemo sentì una predica en cinese e no gavemo capì gnente – invese gavemo ciapà e intesa la Benedission col SS.mo – po dopo gavemo visto el Seminario Grande e anca el  picolo che i Gesuiti i ga en te sto posto – pien de butei e de studenti – avemo visto la Tipografia e comprà dei libri – gavemo visto el famoso Osservatorio Meteorologico che l’è uno dei primi dell’Oriente, e se pol dir del mondo – per causa del Diretor, prima de tuto, che l’è un gesuita brao – magro,  longo e  con una barba che basta vèdarla – e po dopo, per causa dei strumenti otici e machine, dele quali ghe n’è solo do o tre en tutto el mondo – spezialmente un strumento, che me par che i ghe disa – sismografo – anzi a proposito dela sensibilità de sta machina, bisogna che ve diga che l’è tanto grande e fina, che apena che ghe semo vissini, avemo vista la pontina a andar su e zo e segnar come quando gh’è qualche terremoto o tifòn en giro – e cossa elo sta? L’è sta che uno dei me compagni l’ha tirà un sternudon e cossita la ponta la s’è mossa. Bona che ghe gera vissin el Diretor che se ciama P. Gherzi, se no, se nol ghe fosse sta e el fusse andà a vedare più tardi, l’avaria marcà terremoto en qualche parte, e radiotelegrafa ai bastimenti en viajo!

Semo andai, una domenega, ala cesa de S. Giuseppe pure dei Gesuiti, per ascoltar la Messa che i dise ale 8 per i cristiani cinesi. Se vedessi che belessa! La cesa piena e strapiena de cristiani – e tutti i dise le so orazion insieme, ad alta vòsse, e quando l’è sta l’ora dela Comunion, i ga continuà, in du preti, a comunicar più de 20 minuti, quasi tutti quei che g’era, là i ga fato la S. Comunion. E no ghe gera ciacole – no ghe gera male creanze! altro che da noaltri in Italia!? – dove i ciacola, i ride, i parla de affari in cesa e i fa diventar mati i preti e squasi i mete en pericolo la salvazion dela propria anima! Quà quei che jè cristiani, i ghè dal bon – e i fa pulito da restar incantai.

Avemo visto anca un’altra cesa, pure dei Gesuiti, e sola per cinesi, e l’è in fatti collocada nella città cinese, fora da quele tali «Concessioni straniere» che v’ho dito – non l’era miga ora de funzioni, ma i m’ha dito che anca là i fa pulito. Avemo visità anca el vecio P. Rossi gesuita – che el ga 83 anni e l’è 50 anni che el se trova in Cina – la Cina che lu adora e dove l’ha fato tanto del ben; el parla maravigliosamente el Cinese e el lo conosce con tutte le so variazioni – el sa anca el giapponese parché l’è sta anca in Giappon – e po dopo mi  no so quante altre lengue nol sappia – nol sà desmentegà gnancora el napoletan, paraltro – e parlando de Napuli el fa le lagreme. L’è par quelo che mi non go parlà de «Vicente in copa o mare», credo che ve lo ricordarè – quel dall’espresso – par no farlo pianzare e parché no ne vegnesse le lagreme anca a noaltri col ricordo de quel disnareto. L’avemo saludà e lu el n’ha augurà che podemo far tanto del ben, e che podemo anca noaltri passar 50 anni in Cina. Credo paraltro che in questo el s’abbia sbaglià, parché da quà a 50 anni  credo che i gavarà finì anca de cantarne el Requia e smorzà le candele. Che ghe pensa Domenedio par questo – la prima parte de l’augurio, paraltro, credo che la se possa realizzar, se all’ajuto che el Signore el ne dà, non mancarà la nostra cooperazion – mi digo de no, gran fatti!