Tra gli italiani a Tientsin

Tornemo a casa e andemo a prepararse par doman, parché doman parte el vapor per Tientsin e dovemo partir anca noaltri. Digo dovemo, parché al telegramma che gavemo mandà al Ecc.mo Delegato Apostolico da Shang-hai – ga tegnù drio una pronta risposta en te sti termini: «Venite con bagagli Università Pekino». Gavemo tira du salti e in poche ore gerimo pronti. Anca stavolta trovemo el fradel dei Lazzaristi che, come el  n’aveva desbrojà i bagagli all’arrivo, el ne li imbarca alla partenza. Immaginève – el Vapor l’era come na sgussa de nose – el sarà sta longo 30-40 metri – l’era come uno de quei che gh’è nel lago de Garda – pien de cinesi in terza classe, e ghe sarà sta 20 persone nella classe unica – anzi ghe gera anca un talian. Imbarcai i nostri cassoni e ringrazià el bon fradel, sona la cuca e partimo ala volta de Tientsin.

El vapor el se ciamava Fengthien: cossa voja dir mi nol so – quel che so l’è che nol correva gnente, el balava nel mar, come na gàlega. Semo drio a vegner fora dal canal che forma el Porto de Shang-hai, quando vedemo el nostro sgusso fermarse e voltar indrio la prua. Cossa è successo? Gh’è la dogana e soldadi. Che i gabbia savù che ghe gera del contrabando? Che i gavesse savù che noaltri portassimo dele pilole? Eh! parché adesso semo in tempo de revolussiòn in Cina! Cossa ela, cossa no ela, domandemo a qualche d’un dei nostri compagni de viajo: gavemo savù che i faseva l’ispezion per vedare se ghe gera su dei pirati! Misericordia! a sti tempi – Gnente de maraveja. La gh’è tocada pochi mesi o poche setimane fa. In te un vapor, nel più belo che l’era in mezo al mar, salta su una compagnia de persone ben vestie e prima de tuto i va dal Capitano e, cola rivoltella in man, i ghe dise de voltar indrio – nel  stesso momento i mete in tasar i marinari: – e no gh’è, né vojo né non vojo, bisogna che i torna indrio e i mena el vapor a Hong-Kong dove ghe gera la loro sossia – cossa fare? ringraziarli che i sa contentai de pochi schei che i ga trova e no i ga volù la pele de quei pori cani – dopo de alora i fa l’ispezion a tuti i vapori che parte.

El nostro Fengthien, poareto, nol gaveva che gente bona, e l’ha podù voltarse de novo e continuar la so strada. Dopo un giorno e mezo semo arrivai a Wei-hai-Wei – dove ghe gè un vicariato dei Lazzaristi – un postesin belo, ma picolo – se semo fermadi poche ore e po dopo avemo continuà – no semo gnanca smontai parché no valeva la pena.

Adesso che son qua, bisogna che ve diga che me son desmentegà de dirve che a Shang-hai, nel porto se vede anca dele nave da guerra francesi e inglesi. Gè lì che le guarda cossa fa sti, cinesi; e se no i fa giudizio e no i rispetta i interessi stranieri e i missionarii, come ghe gè stabilìo dai loro tratati, jè  pronte a romparghe le coste.

Ben coratinuemo e vedemo se arivemo a sto Pekin, parché semo stufi de acqua e ne par de avenghela fino in scarsela. Contemo i giorni,  contemo le ore – presto ghe semo – dai, corri, musso de un vaporeto – corri, dai, fa presto! gnanca farlo a posta! l’è mezzanote e lu el se ferma. Ne svejemo e volemo saver cossa è successo. Mi, (che dormiva sul pavimento dela cabina, parché quei fioi de tenche i m’ha messo el calorifero proprio sotto el leto e el fazeva un calor da brusarme la schena), me vesto e vago a vedare cosa ghe zè. Un’altra volta, come gh’è tocà al Kashima, non gh’è acqua e no se pol navigare. Me vegnù proprio in mente de cantar, e gò anca canta entrando in cabina, la storia del povero giovane, che dopo lunga e lunga e lunga e lunga navigazione, l’acqua venne, l’acqua venne, l’acqua venne a mancar. Cossa volìo farghe? Dormimo e quando crescerà l’acqua andaremo inanzi.

Intanto ala matina gavemo visto altri vapori fermi come el nostro, e quando jè stade le 9 provemo andar inanzi, e rompendo le stèle de giasso ghe riuscimo.

Passemo per Takù, dove vedemo le rovine dei forti che gà salva Pekin, al tempo de la guera coi giaponesi, che i gaveva ciapà Port Artur. Robe da poco – no ste miga immaginarve che i sia come i nostri forti! jè muci de terra, con dele fuciliere – ma se vede che i ga servì parché Pekin non i lo ga miga ciapà. – Passemo donca sto Takù e infilemo el Canal che va fin, a Tientsin. Le rive jè abitade da case de pora gente, tute de terra e paja – ghè un freddo can che el va zo fin a 12 e 13 gradi soto zero e se vede giasso e giasso. Finalmente se presenta anca Tientsin. Proprio en te l’entrada, vedemo una nave da guerra – l’è inglese – un pochetin piassè innanzi ghe n’è un’altra e la gà la bandiera italiana. De fatti la se ciama «Cabotto» e ghè su dei soldadi marinari italiani del Battaglion S. Marco. Bravi zoveni e bei e, quasi che i gavesse sentì l’udor, quando passemo noaltri i ne saluda – e noaltri ne semo levà el capelo a lori e anca a quela bela bandiera bianca rossa e verde. Se fermemo e trovemo ala banchina, el fradel dei Lazzaristi, che qua i comanda lori, che el ne aspetava conforme istruzione avuda da Shang-hai.

El desbriga i nostri bagagli che qua no i ga gnanca bisogno de essar esaminadi, parché non go visto doganieri e dall’altra noialtri gavevimo la carta che la diseva che gera stai visitadi a Shang-hai (che l’era na bala) e andemo driti dai Lazzaristi, anca quà i ga una Procura. Ricevudi come e più che fradei – i ne stabilisce una camara par ciascuno e se lavemo e1 sciafai.

Prima de sena gavemo volù visitar el Console italian, che l’è ebreo ma l’è bon – tanto che el n’ha tratà pulito e el n’ha promesso de mandar du soldadi de polizia (italiani anca se Cinesi) a acompagnar, doman, i nostri bagagli fin a Pekin, parché in treno qualcuno no se inventasse de gratarne  qualcossa.

Dopo andemo a visitar i soldadi del Battaglion S. Marco – e po dopo l’ospedal italian – dove che è capelan el Padre Chieli italiano e gh’è le moneghe dela Misericordia, ma no quele de Verona o de Savona – passando vedemo una  splendida e grandissima Caserma fatta per i soldati italiani dal Governo italian, e andemo in fin a finirla in casa del P. Chieli, che l’ha volù mostrarne come anca in Cina se pol far del vin e bon – lui el l’ha fatto. Noaltri tornemo par senàr en casa dei Lazzaristi – el Superior envese el se ferma a predicarghe ale moneghe dell’ospedale el magna dal P. Chieli, che per far compagnia,  l’aveva  convidà anca altri du o tri taliani dela so amicizia.